سادس الراشدين

ذكرت صحيفة أخبار اليوم في عددها الصادر السبت ان الدكتور يوسف بطرس غالي وزير المالية فوجئ بمدير مكتبه يخبره ان مدير الجمارك يريده في امر هام.

واتصل غالي بمدير مصلحة الجمارك قائلا: خير ان شاء الله ادخل في الموضوع على طول.

قال له: يا فندم عندنا كرتونة بلح صغيرة قادمة من الامير فهد بن سلطان امير منطقة تبوك باسم الرئيس حسني مبارك وحضر موظف من رئاسة الجمهورية لاستلامها، لكنه يصر على دفع الرسوم.

قال الدكتور غالي لمدير الجمارك: ازاي ما كنتش عايز تاخد منه رسوم، على طول خد رسم الوارد.

رد مدير الجمارك: حاضر يا فندم.

وبعد دقائق اتصل الدكتور غالي مرة أخرى بمدير الجمارك: ماتنساش تاخد ضريبة المبيعات على الكرتونة.

وبالفعل تسلم احد موظفى الرئاسة الكرتونة بعدما سدد الرسوم المستحقة عليها وهي 30 جنيه رسم وارد و35 جنيه ضريبة مبيعات.

وصدر ايصال سداد بقيمة 65 جنيه باسم الرئيس محمد حسني مبارك رقم 5692006 نموذج 37 واسم موظف الخزينة عبدالله احمد.

وهكذا اعزائى المستمعين يضرب الامام العادل حسنى بن مبارك اروع الامثله فى الشفافيه والوضوحيه والاخلاق والمثل العليا والضحك على الدقون .
الخبر ده لو صحيح تبقى كارثه لان البيه مدير الجمرك اللى هو من المفترض امين على هذا الشىء رايح لبطرس بيه غالى يقوله موظف الرئاسه مصمم انه يدفع الجمارك يعنى البيه المدير ماكانش عايز ياخد الرسوم والح على السيد الموظف مندوب الرئاسه لكن السيد الموظف مندوب الرئاسه قد تجمعت فيه كل قوى الامانه والحفاظ على المال العام وابى الا يخرج بكرتونه البلح الا بعد ان يسدد الــ65 جنيه وعمار يا مصر يا ام الدنيا يااللى خربوكى واكلوكى ومصوا دم اللى جابوكى وصمموا ان يدفعوا الــ65 جنيه
انا بقى عايز الاخوه اللى مصدعنا طول النهار والليل بالفساد والحوارات الفشله دى يجوا يتعلموا من السيد رئيس الجمهوريه.عفوا السيد سادس الراشدين وااقول لهم كل محاولاتكم مكشوفه ايها الحاقدين على مصر وعلى امير المؤمنين اى سماء ظلتكم واى ارض ترعرعتم فيها(حلوه اوى ترعرعتم دى ممكن تعمل شغل جامد اوى)ايها الحاقدين المتأمرين على شعب مصر وزعيمها البار اتركوا هذا الشعب يهنىء باميره وسيده وتاج راسه واتركوه كى يسطر اروع الامثله فى العداله التى كاد ان يفوق فيها ثانى الراشدين الفاروق رضى الله عنه اتركونا نهنىء بسادس الراشدين
عوده للخبر
(وبعد دقائق اتصل الدكتور غالي مرة أخرى بمدير الجمارك: ماتنساش تاخد ضريبة المبيعات على الكرتونة.) طيب الجمله دى مش بتفكركوا لما تطلبوا واحد كشرى لوكس وبعد الراجل ما يمشى تنده عليه وتقوله كتر الدقه