أنا مش ناسيكى

انا عارف انك زعلانه منى علشان انا مش بسأل عليكى فى الايام الصعبه دى ومتأكد انك بتقولى عليا نسيتك بس انا بعذرك وكنت متوقع منك كده علشان انتى مش عارف الحقيقه لاأنك لو عرفتى الحقيقه أنتى كمان هاتعذرينى بصى يا غزه انا بشتغل 12 ساعه وساعتين ضايعين فى المواصلات و6ساعات نوم يعنى 20 ساعه فى اليوم ضايعين والاربع ساعات الباقيين مش ناوى ااقضيهم فى فرجه على مناظر الدم والحرب والكلام ده علشان انا حساس اوى ولما بشوف منظر الدم بتأثر ويجيلى اكتئاب بس ساعات بشوف اخبارك فى الجورنان وبزعل شويه مش كتير الصراحه بس بزعل برضه ده مهما كان احنا عرب ومسلمين والحيط جنب الحيط وكمان داخل علينا مباراه القمه واستعدادات ومتابعه اخبار الاهلى والزمالك ومين هايلعب ومين هايقعد على الدكه بس على فكره يوم الجمعه اللى فاتت وانا بصلى الجمعه الامام دعالك كتير وانا قولت امين مش كده وبس ده لما قال ان فى تبرعات هاتروحلك انا دفعت 5 جنيه علشانك وانتى عارفه قد ايه العيشه صعبه والحياه بقت كلها مصاريف ده انا لسه بجمع فى تمن الموبايل ابو الفين جنيه وانتى عارفه طبعا قد ايه الموبايل بقى مهم وماحدش يقدر يستغنى عنه وان شاء الله هاعمل مظاهره جامده اوى علشانك .علشان الناس تعرف قد ايه انا متأثر علشانك وهاحرق فيها علم اسرائيل ربنا ياخدها وهاحرق علم أمريكا كمان علشان هى سبب كل البلاوى اللى انتى فيها.واللى انا مبسوط منه اوى ان العرب كلهم خايفين عليكى وهايموتوا علشانك حسنى مبارك قال لجورنان فى فرنسا ان قلقان اوى عليكى وانه بيطلب من اسرائيل انها ماتزودهاش وكفايه عليكى كده .وحسن نصر الله قال انه ان شاء الله هايضرب صاروخين على اسرائيل .والقذافى بيدور على حته ارض فاضيه على حدودك علشان يبيد دوله اسرائيل.شوفتى بقى يا ستى الناس قد ايه زعلانه علشانك ومهتمه بيكى وانتى اللى ظالمنى بس انتى اكيد كده فهمتى وعرفتى ان انا مش ناسيكى .