مخبول العصر

يحب الظهور حتى وان ظهر بمظهر البلياتشو اللى عجز وبقى مش عارف يضحك عيل عنده سنتين كل يوم فتوى وكل يوم حكايه الراجل مايقدرش مايظهرش .
ابتديت اعرفه لما ظهرت مواهبه الفذه لما وضع يده فى يد نوال السعدواى باباحه امامه المرأه ثم التسميه باسم الام يعنى يكون اسمه جمال فوزيه البنا واتفتحت حنفيه الفتاوى اللى مش لاقيه سباك يحطلها جلده وخد عندك 3سجاير فى نهار رمضان مايفطروش.
طيب 3سجاير وتخميسه يا مولانا حكمها ايه؟
والحجاب غير شرعى وان الحجاب انما شرع علشان يحمى شعر المرأه من التراب والحر اللى قصفولها شعرها. وده طبعا على اساس ان صانسيلك ماكانش لسه طلع. وان الحجاب يادوب بس يغطى فتحه الصدر.واشمعنى يعنى فتحه الصدر ماتسيبها مفتوحه يا مولانا. ويجوز ان تتزوج المرأه بدون ولى ولا شهود.
طيب وايه الفرق بين الزواج والزنا يا عم الشيخ
وان الاسلام لم ياتى لينسخ باقى الاديان لا ده جه علشان كلهم يمشوا مع بعض .وماقالش مولانا يمشوا يروحوا فين
وان الاسلام مافيهوش حد رده واللى عايز يكفر يكفر هو حر احنا مش قولنا الاديان كلها زى بعضها وان كلها حلوه وهاتدخل الجنه
روى البخارى فى صحيحه عن ابن مسعود رضى الله عنه ان رسول الله صلى الله عليه وسلم قال
لا يحل دم امرئ مسلم ، يشهد أن لا إله إلا الله وأني رسول الله ، إلا بإحدى ثلاث : النفس بالنفس ، والثيب الزاني ، والمفارق لدينه التارك للجماعة
طبعا الحديث ده لازم يخليه يشكك فى صحيح البخارى. الراجل الصراحه متاخرش وشكك على طول مش فى صحيح البخارى بس لا فى الاحاديث كلها وقال ان كثير من الاحاديث يتعارض مع القرأن وده يدل على ان مولانا ما فتحش كتاب واحد بيتكلم عن علم الحديث.
طبعا مولانا ما سكتش ريح شويه كده اخد فيها نفسه وقام رازعنا فتوى عجب.
لما ولد وبنت بيحبوا بعض ومش لاقين يتجوزوا يقضوها بوس ولو شويه ملامسه على خفيف كده من فوق الهدوم ماتعملش حاجه بس ايه لازم بعد ماتخلص تقوم تعملك شويه حسنات كده على خفيف علشان ربنا يسامحك على طول
بس انا لى سؤال اترضاه لامك اترضاه لابنتك ؟ اترضاه لاختك؟ فان كنت ترضاه فانت لاتستحق عناء الكتابه والرد وان كنت لاترضاه فكبف ترضى لبنات المسلمين مالاترضاه لاهل بيتك.
كل الفتاوى دى وغيرها كتير ومع ذلك مش قادر اسىء الظن بالراجل ودايما احسن الظن به واقول الراجل كبر وخرف.
استاذ جمال البنا انت تستحق وعن جداره لقب مخبول العصر